Skjólbeltarækt
Vindur er oft á tíðum mikill skaðvaldur í skógrækt, matjurtarækt og til trafala í búfjárrækt. Hann dregur úr uppskeru og veldur skemmdum á gróðri, flytur með sér snjó, veldur kælingu á fólki og skepnum, eykur húshitunarþörf. Vel hönnuð skjólbelti geta dregið mikið úr neikvæðum áhrifum vinds. Skjólbelti eru til mikilla prýði, bæta ásýnd bæja og nýtast vel til að fela ruslahauga og annað sem ekki á að sjást. Hægt er að nota skjólbelti til að tempra hávaða t.d. frá umferð.
Eitt stakt skjólbelti gerir takmarkað gagn, því er æskilegt að rækta net skjólbelta sem vinna saman. Skjólbelti geta verið frá einni trjáröð upp í fimm til sex trjáraðir á breidd, allt eftir aðstæðum og hentugleika.
Vanda þarf allan undirbúning til að skjólbeltið geti vaxið vel og áfallalaust.
Vinnuferli við gerð skjólbelta:
- Land sem leggja á undir skjólbelti er plægt
- Plægja þarf u.þ.b. 2 m. breytt fyrir hverja röð, ef leggja á tvöfalt belti þá þarf að plægja 4 m. breytt
- Dreifa húsdýraáburði yfir plægingarnar (ekki spara hann).
- Tæta með tætara tvisvar sinnum yfir.
- Plastleggja með plastlagningavél. Ef vandað hefur verið til verka varðandi jarðvinnsluna þá gengur greiðlega að plastleggja. Gæta þess að jaðrar plastsins séu vel á kafi svo það fjúki ekki upp.
- Að lokum er plastið fergjað með möl svo að það lemjist ekki til í vindi.
- Best er að ljúka jarðvinnslu haustið áður en gróðursetja á í beltið þá er hægt að planta um leið og frost er farið úr jörðu.