20 manna hópur nemenda í Grænni skógum á Suður og Vesturlandi fóru á dögunum í 7 daga námsferð til Skotlands. Farið var á ýmsa staði þar sem skógræktarfólk á svæðinu hafði skipulagt dagskrá og leiddi okkur um skógana.

Byrjað var á því að skoða einn besta Sitkagreniskóg Skota þar sem við fræddumst um ræktun sitkagrenis, umhirðu og markaðssetningu skógarins.
Síðan var haldið inn í Hálöndin þar sem við hittum aðila frá skógræktinni sá, sá um fjölbreytileika skóganna og verndun náttúruskóga. Hann leiddi okkur í gegnum einn best varðveitta skógarfuruskóg í Skotlandi.
Á þriðja staðnum skoðuðum við forna eikarskóga og fræddumst um vistkerfi þeirra, sögu og nýtingu.
Að lokum fórum við út í eyjuna Bute þar sem fólkið á eyjunni hafði sameinast um að kaupa risaskóglendi á norðurhluta eyjarinnar og gera hann að almenningseign. Á eyjunni tók á móti okkur forsvarmaður verkefnisins og fræddi okkur um skóginn, náttúru eyjarinnar og menningu.
Á Bute skoðuðum við fræga garða í kringum Mt Stuart herragarðinn, fórum á hálandaleika og skoskt þjóðdansaball í kastalanum.

Milli þess sem við vorum í skógargöngu skoðuðum við sögufræg tré m.a. ýviðartré sem er hugsanlega elsti núlifandi einstaklingur í Evrópu, elstu eikina, hæsta tré Evrópu og voldugasta tré Evrópu.

Ferðin var í alla staði mjög fín, skemmtilegt fólk, áhugaverðir staðir, fallegt land og skipulagið alveg til fyrirmyndar.
Farastjóri ferðarinnar var Arnlín Óladóttir og færi ég henni bestu þakkir fyrir allt.